comentar
publicado por Hercus Santos at 12:04 pm

 

Iha Timor feto nia inan-aman no família sira sempre hakarak hatene família. Hau iha esperiensia ida hanesan ne moos. Hanesan moos hau nia primo ida. Hau nia pai konta katak uluk iha lia adat ida hau nia primo ida nian hau nia Pai hasoru malu ho Komandante Falur Rate Laek. Komandante karik hakarak halo konfirmasaun deit  karik lori hakarak hatene deit ami nia uma lisan nia pozisaun ne iha leten ka iha kraik lori hanoin karik ami nian iha kraik entaun sei sosa malu. Mas hau nia Pai dehan ba Komandante katak lae. Ita sei la sosa malu ida.

 

Hau husu ba Pai ne’e tanbasa? Hau nia Pai esplika katak tanba hau nia primo ne mai husi Ada Soran no tuir adat Pai nian ada soran nudar oan mane iha uma lisan Ada Lulin ( Dato Bamatak) nia laran. Tanba Ada Soran ho uma lisan kiik balu tan hamutuk ho Ada Lulin ne’e jerasaun ida de’it, ran ida deit. Iha adat uma Dato Bamatak nunca bele sosa atu halo pozisaun hanesan. Uma Dato Bamatak iha pozisaun aas tiha ona. Ou ita hanesan ou ema seluk sosa lori halo sejajar ho uma Dato Bamatak. Hau husu ba Pai mezmu uma Liurai Dom hosi Lorosae ou Loromonu ita la bele sosa atu hanesan? Tanba ita Uma Dato deit laos Uma Liurai. Pai hatan katak lae. Ita nunca sosa. Tanba uluk ita mai hosi We-Hali ita mos lori lisan lori ukun (mai husi We-Hali beiala sira sae lafaek) mas tanba ita nia beiala nain rua (Maun-Boot haruka fila hikas Leikau-Malikau nebe lori rota Wehali fila hikas ba We-Hali no depois Maun-Boot ne taka tiha dalan) hatun malu maka Leikau-Malikau la bele fila fali. Mas Leikau-Malikau fila dalam bentuk belak mean nebe tama ba uma lisan dadir lian no bainhira nia sai moos dadir lian. Tanba ne’e maka halo kompetisaun iha Foho Ai-hahi ita manan hotu mas ita lakon iha lisan hakoi mate. Mezmu ita lakon iha lisan hakoi mate no depois hatur Na’i Koli-Na’i Nahak nudar Liurai Manehiak no Liurai Manekaolik laos significa ita nia uma lisan iha pozisaun okos, lae.

Ita la ukun mas ita nia pozisaun iha adat aas nafatin. Bainhira Na’i Nahak (Liurai Manekaolik) halo uma been husu moos beiala Dato Bamatak nian ba asiste lori ho sasan lulik Dato Bamatak nian. Liurai Maneka’olik dehan ba beiala Dato Bamatak nian katak ita ne’e ida de’it nebe ita nia sasan lulik tau hamutuk deit. Mas beiala Dato Bamatak nian dehan ba Liurai Manekaolik sasan lulik Dato Bamatak nian lulik makas. Mas Liurai Manekaolik la fiar obriga nafatin katak Dato Bamatak ho Liurai Manekaolik ida deit nebe sasan lulik bele tau hamutuk. Entaun beiala Dato Bamatak nian mos halo tuir deit hatur sasan lulik Dato Bamatak nian hamutuk ho Liurai Manekaolik nian. Mas kuandu halo ona ritual Liurai Manekaolik hamulak lori fui tua ba sasan lulik Liurai Manekaolik nian derrepente ahi han tiha sasan lulik, osan mean lulik Liurai Manekaolik nian hotu kedas. Tanba atu lori respeita Liurai Manekaolik, beiala Dato Bamatak nian fo fali belak mean ida hanesan lori hatomak fali osan mean nebe maka ahi han hotu tiha ne. Belak mean nebe Dato Bamatak fo agora tau iha uma lisan Liurai Manekaolik.

 

Tanba koalia lia adat principal sira Ada Soran nian (hanesan kazamentu ou lia mate) hatur mama fatin ne mai hosi Ada Lulin nian. Iha kazu balu Ada Soran bele hatur rasik mama fatin mas kuandu sira atu mama tenke hasai malus tahan ida sira tau hela ba bolsu no tenki lori ba Ada Lulin. Tanba Ada Soran nudar oan mane maka iha pozisaun nebe aas moos hanesan Inan ho Aman maka Ada Lulin no nunca bele sosa lisan lori halo pozisaun hanesan ho uma lisan dato ou liurai sira seluk. Esplikasaun ne ba ema nebe hosi fatin seluk. Mas se maluk ruma hosi uma lisan Liurai Funar laran ou uma lisan Liurai Manelima nian husu tok ba sira nia família se iha sira nia jerasaun ruma ou família ruma keta sosa malu lori sejajarkan malu karik? Lae! Uma Dato Bamatak iha leten tiha ona ate iha uma lisan kiik ida (nebe laos jerasaun ida) bolu Ada Lulin nudar Inan Maromak, Aman Maromak. Úniku uma lisan kiik ida iha Laklubar laran tomak (karik mos iha Timor, hau la hatene no karik deit) maka bolu sira-nia uma Lisan Boot nudar Inan Maromak, Aman Maromak. Tanba ne uma Dato Bamatak nunca iha uma lisan kualker ida nia okos. Ou hanesan ou iha Uma Dato Bamatak nia okos.

 

Nota: Bele konfirma ho lia-nain sira no katuas sira hotu iha uma Dato Bamatak nia laran.

 


comentar
publicado por Hercus Santos at 12:02 pm

 

Dalaruma ema timoroan balu dun hau otonomista mas sira la hatene katak hau uluk defende ukun rasik an. Mezmu iha militar Indonésia nia leet hau sei brani lori defende ukun rasik an. Hau iha testemunha ba ida-ne’e mas hau la presiza hateten. Hau so hateten no konta Istória ne’e bainhira presiza. Hau defende radikalmente Fretilin liu-liu tanba hau ema Fretilin hakarak ukun rasik an no liu-liu hau nia avo (pai nia pai)nudar delegado Fretilin iha Funar iha tinan 1975 la bele saugate. Liu-liu mos hau hakarak valoriza hau nia maun no bin nain rua nebe mate iha 1975 tanba invazaun Indonesia nian. Sira mate kiik. Sira laos luta nain. Mas sira mate tanba hau nia abo, hau nia pai lakoi integrasaun lori halai subar iha ai-laran tuan sira. Sira mate laos tanba kilat musan maka tiru. Maibé kilat musan ema invasor sira tiru lori hadau sira-nia liberdade. Sira mate tanba hamlaha no malirin. Mezmu nune’e se sira moris karik hau sei hetan vantajen diakliu. Mas destinu ita ema nian ita hotu la hatene. Heroi boot ida nebe maka moris karik sei lori vantajen boot ba hau nia família maka Komandante Diogo Moniz da Silva nebe nudar hau nia pai ninia comandante.

 

Mezmu hau ema radikal ba ukun an no ba Fretilin mas hau respeita hau nia maluk UDT sira tanba sira moos luta ba ukun mezmu luta iha dalan klaran. So Fretilin maka mantein ninia prinsipiu ukun an mezmu tenke muda buat lubuk balu lori adapta an ho conjuntura politika rai laran no moos conjuntura politika internasional. Hau mos respeita otonomista sira tanba buat nebe maka ita presiza agora maka unidade lori harii Timor-Leste ida sai diak liu. So ita unidade lori halibur ita nia potensia hotu-hotu hamutuk maka ita bele lori Timor-Leste ba oin. Ita idak-idak kontribui ba desenvolvimento Timor-Leste tuir idak-idak nia bele. Iha Timor-Leste independente la iha tan ona otonomista ou independentista so iha deit maka ema rezisténsia no ema laos rezisténsia. Kestaun ida ne’e tenke iha nafatin lori valoriza eternamente luta na’in sira nia kontribuisaun. Hau agora laos Fretilin mas se iha ruma hakarak estraga istória Fretilin hau prontu defende Fretilin tuir hau nia kapasidade no conhecimento. Fretilin la bele mate. Fretilin tenke iha nafatin lori konta istória Timor-Leste nian. Mai hau importante liu maka la iha independentista no otonomista tanba Timor-Leste ukun rasik an tiha ona no la presiza ona liafuan rua ne’e atu moris nafatin iha Timor-Leste no la presiza moos liafaun rua seluk maka lorosae ou loromonu. Timor-Leste presiza maka sidadaun nebe maka presiza fo kontribuisaun lori harii estado Timor-Leste ida ho diak no atu moris sidadaun hotu-hotu nian sai diak moos. Timor-Leste nia ukun an la vale buat ida bainhira sei iha Timoroan ida moris aat tanba hamlaha, uma la iha, la eskola, hetan injustisa iha moris hosi ukun nain sira ou hosi estado ou hosi sosiedade, hetan diskriminasaun, hetan violasaun ba ninia direitos fundamentais sira hotu. Libertação da Pátria ita halo tiha ona. Agora ita presiza kondisaun hotu-hotu lori halo libertação do povo.

 

Akontese moos ba hau nia tiun (mãe nia alin) Carlito Boavida nebe uluk nudar xefe suku Funar (dezde tempu Indonesia to ukun na) depois ukun an ema balu akuza nia oioin ho lia falsu kesar ba polisia hosi Dili ba kaptura hau nia tiun iha Funar (iha momento comandante L7 nudar mos responsável mos ba PNTL) mas sorte rezistensia Laklubar taka dalan Laklubar lori ezije hatun hau nia tiun iha Laklubar.Membru polisia sira haree katak populasaun barak maka ezije hatun hau nia tiun no ikus mai polisia sira hatun duni hau nia tiun iha Laklubar.

 

Kuandu ema akuza hau otonomi ne tanba ema sira na la conhece hau ou ema balu la gosta hau no ema nebe la gosta hau koalia ba ema nebe la conhece hau no ema nebe la conhece hau sai fiar ho liafuan nebe maka mai husi ema nebe la gosta hau. Ikus mai ema nebe la conhece hau sai la gosta hau mos.

Se família balu maka akuza hau otonomi ne tanba la gosta hau bele akuza fali hau otonomi. Mas família hanesan ne hau garante katak tanba karik sira hela iha rai liur ou entre ami nunca ransu malu ho diak ou tanba iha tempu Indonésia sira sei kiik ou se sira ema boot entaun ho serteza absoluta sira uluk iha tempu Indonésia ami nunca ransu malu no sira la conhece hau maka ikus mai sira dun fali hau otonomi. Se hakarak, entaun ba konfirma ho família sira nebe hela dezde tempu Indonesia nian to’o tempu ukun rasik an iha Laklubar ou iha Funar sira ou hela iha Dili mas ami ransu malu ho diak entaun sira hotu sei dehan hau ema pro independensia no laos pro independencia deit mas hau ema radikal Fretilin iha tempu uluk agora lae, agora hau ema moderadu no la iha partidu. Mas hau maubere para sempre! Maubere ne’e nu’udar ran nebe maka halai iha hau nia uat ou nudar hau nia iis tanba isin la iha iis katak mate. Hau ema Maubere tanba ne’e maka hau hakeek poezia ida ho títulu Povo Maubere nebe publika iha revista Lian Maubere. Iha momento neba revista Lian Maubere sei moris no nia sede besik Kampu Demokrasia. 

 

Se maka integracionista ka laos diak liu husu ba komunidade nebe ema ne hela ba ou ema ne ninia asal usul. Husu ba responsável rezistensia nian sira ne’e maka hatene diakliu duke ita hosi comunidade ou aldeia seluk maka akuza arbiru deit.

 

Mas mai hau buat ne normal tanba uluk iha funu ita subar an tebes. Ita deskonfia malu. Tanba ita la hatene se nia apoiu ukun an ka integrasaun-otonomi. Ita bele oin midar ba malu mas laran ita la conhece malu. Ita bele conhece malu kulit mas fuan ita la conhece malu. Kecuali ita halo parte ba grupu ida, rain ida, aldeia ida ou comunidade ida.


comentar
publicado por Hercus Santos at 11:59 am

 

Isu-Isu Direitus Umanus, Nova Era (Orde Baru) no Komunizmu iha eleisaun prezidensiál Indonézia nian 2014

 

Ita hotu akompaña polítika Indonézia nian, liu-liu, iha momentu eleisaun prezidensiál nian ne’e. Mai ita ba haree liu de’it problema prinsipál no sensitivu sira relasiona ho Direitus Umanus, Nova Era (Orde Baru) no Komunizmu iha eleisaun prezidensiál Indonézia nian 2014.

 

Durante tempu kampaña prezidensiál, ha’u lakohi atu halo komentáriu ida, iha situasaun hanesan ne’e, ita presiza kuidadu no iha sensibilidade, atu la hamosu interpretasaun ne’ebé laloos, julgamentu oioin no ema seluk la bele uza lori “klaim” tun-sa’e. Liutiha eleisaun, ha’u hakarak halo komentáriu ruma ne’ebé iha relasaun liu ba problema ne’ebé maka sai polémika liu durante kampaña nia laran kona-ba alegasaun ba violasaun Direitus Umanus, preokupasaun husi ema balu nian kona-ba possibilidade atu mosu fali Nova Era/Orde Baru II, ou posibilidade atu mosu fali komunizmu iha Indonézia.

 

Ba dala uluk, ha’u hakarak saúda povu Indonézia ba sira-nia susesu lori hala’o eleisaun prezidensiál ne’ebé maka la’o iha ambiente paz nia laran. Nu’udar sidadaun estranjeiru no moos nu’udar sidadaun husi nasaun viziñu, ha’u-nia hanoin halai hanesan moos ho ita-nia antigu Prezidente Repúblika Dr. José Ramos Horta katak ita respeitu prosedimentu legál Indonézia nian. Sé sé de’it maka manan eleisaun, ita respeita desizaun povu Indonézia nian no Timor-Leste sei simu (bem vindo) bainhira prezidente eleitu hakarak vizita ita-nia rain. Biar se kandidatu Prabowo maka eleitu karik moos ita sei respeita no sei simu nia iha Timor-Leste hanesan moos ba Jokowi.

 

Ho hanoin katak problema Direitus Umanus nu’udar problema universál no sempre atuál entaun ha’u haree katak sé sé de’it maka manan sei hasoru difikuldade ruma atu rezolve problema sira-ne’ebé relasiona ho Direitus Umanus ne’e iha Indonézia.

 

Prabowo sei hasoru difikuldade atu rezolve problema Direitus Umanus iha tempu pasadu tanba, hanesan ita hotu hatene, katak iha alegasaun kontra Prabowo. Ha’u uza liafuan alegasaun ho hanoin ida bazeia ba prinsípiu Prezunsaun Inosénsiu tuir Declaração Universal dos Direitos Humanos de 1948, artigo XI número 1 “Toda a pessoa acusada de um acto delituoso presume-se inocente até que a sua culpabilidade fique legalmente provada no decurso de um processo público em que todas as garantias necessárias de defesa lhe sejam asseguradas”.

 

Jokowi moos sei hetan difikuldade hanesan. Ne’e la’ós tanba Jokowi iha moos alegasaun ba violasaun Direitus Umanus maibé iha ninia tim kampanye iha moos ema balu ne’ebé maka iha alegasaun forte ba violasaun Direitus Umanus. Ha’u hanoin katak iha polítika, bainhira iha apoiu malu tenke iha vantajen ba malu (recíproca). Ne’e katak líder ida ou partidu polítika ida kuandu halo parte ba comissão de apoio iha kandidatura nia laran, nia ou partidu ne’e hein katak sei hetan buat ruma bainhira sira-nia kandidatura manan. Iha polítika bele vale hanoin ida katak “give and take” ou pelumenus “give and hope to take”. Tanba ne’e maka ha’u hanoin katak Jokowi moos sei iha difikuldade atu rezolve problema sira Direitus Umanus nian.

 

Ha’u hanoin katak se Indonézia hakarak tebes atu rezolve alegasaun ba violasaun Direitus Umanus iha passadu (inklui moos violasaun Direitus Umanus iha Timor-Leste), Indonézia tenke halo buat rua hanesan tuir mai ne’e:

 

Primeiru, Indonézia tenke reformula hikas prosedimentu legál kona-ba kandidatura Prezidente Repúblika nian. Ho lei número 42, 2008 kona-ba eleisaun prezidensiál ne’ebé maka regula katak só partidu ou partidu polítiku sira ho votu porsentu 25 ou ho kadeira porsentu 25 iha eleisaun lejizlativa iha parlamentu (DPR) maka bele aprezenta kandidatura ba eleisaun prezidensiál. Lei ne’e moos limite atu partidu ki’ik sira bele aprezenta moos sira-nia kandidatura rasik. Inklui limite moos kandidatura independente. Ne’e katak kandidatura tenke aprezenta husi partidu polítiku ida (ne’e katak partidu ne’e tenke boot no hetan persentajen votus ou kadeira hanesan iha leten ne’e) ou lubun partidu polítika sira. Entaun partidu sira-ne’e ita haree baibain mai husi partidu sira-ne’ebé maka tuan ou ninia líder sira mai husi Istória pasadu nian ne’ebé ladun di’ak no bele iha possibilidade boot ba alegasaun ba violasaun Direitus Umanus. Porezemplu hanesan iha team kampanye Jokowi nian (tanba halo koligasaun) husi partidu balu ninia emar importante iha moos alegasaun ba violasaun Direitus Umanus. Se Indonézia hakarak tebes duni atu rezolve sira-nia problema ba violasaun Direitus Umanus, sira tenke reformula hikas lei ne’e no halo hikas lei ne’ebé bele fó fatin       atu partidu ki’ik sira moos bele aprezenta rasik sira-nia kandidatura no moos bele fó fatin moos ba kandidatura independente. Ha’u-nia preferénsia partidu maka aprezenta ninia kandidatura (ho hanoin hanoin katak Indonézia nasaun ne’ebé maka boot no ninia emar barak tebes) no halo lei ne’ebé ninia persentajen ki’ik tantu husi votu komu husi kadeira iha parlamentu. Tanba iha partidu polítiku sira balu sira-nia emar importante sira la iha alegasaun ba violasaun Direitus Umanus. Entaun husi ne’e maka iha kandidatura ida eleitu entaun nia sinte livre liu lori rezolve problema Direitus Umanus iha Indonézia.  

 

Segundu, Indonézia tenke ratifika Sistema Internasionál Protesaun Direitus Umanus no moos tenke asegura prinsípiu supremasia Direitu Internasionál iha ninia ordenamentu jurídiku internu.

 

Só ho nune’e maka povu Indonézia ( no moos povu Timor-Leste) bele iha esperansa ba solusaun alegasaun violasaun Direitus Umanus iha passadu no moos bele fó esperansa liu-liu ba Indonézia lori iha garantia ba protesaun ba Direitus Umanus. Saída de’it maka atu halo lori rezolve problema Direitus Umanus iha Indonézia, Indonézia di'ak liu, ba integridade rai nian no unidade povu nian, halo tuir hanesan saída maka akontese iha África do Sul (ne’ebé Timor-Leste moos halo tuir). Kria hanesan Comissão de Acolhimentu, Verdade e Reconciliação lori rezolve problema sira ba alegasaun violasaun Direitus Umanus iha Indonézia ninia rai laran.

 

Ita iha konxiénsia katak violasaun Direitus Umanus hanesan iha Indonézia no moos iha Timor-Leste iha pasadu nu’udar konsekuénsia ida husi konjuntura polítika internasionál nian. Iha kestaun Indonézia nian, bainhira Ir. Soekarno monu lori harii Nova Era (Orde Baru) ho Soeharto no durante Soeharto ninia ukun EUA (reprezenta nasaun osidentál sira) maka sempre fó apoiu ba nia. Inklui iha-ne’e moos invazaun Indonézia nian ba Timor-Leste. Problema rua ne’e, Soekarno nia monu no hamosu Nova Era (Orde Baru) Soeharto nian akontese iha ambiente Guerra Fria nia laran. Entaun ita bele dehan katak konjuntura polítika internasionál maka provoka buat sira ne’e akontese. Iha kontestu Timor-Leste nian rasik, Indonézia rasik iha inísiu la iha hanoin atu reklame Timor-Português. Liuhusi Ministru Rai Liur Indonézia nian iha 1975 haruka karta ofisiál ida ba ninia omólogu Dr. José Ramos Horta lori hateten, entre seluk, katak Indonézia respeita Timor-Leste ninia Ukun Rasik An.

 

Komplikasaun, iha rezolusaun ba alegasaun violasaun Direitus Umanus nian iha Tribunal iha kazu Timor-Leste nian, akontese tanba iha intervensaun direta ou indireta husi nasaun sira-ne’ebé maka ema hanaran “mestre no na’in” ba Direitus Umanus iha mundu durante liu tinan 20 nia laran ba violasaun Direitus Umanus iha Timor-Leste. Ou se violasaun Direitus Umanus hetan duni julgamentu iha Tribunál sei mosu imparsiál no la iha justisa tanba baibain membru ki’ik sira de’it maka hetan pena no kumpre pena to’o hotu no ne’e hanesan “amostra” ida de’it ba julgamentu violasaun Direitus Umanus ba públiku ou ba mundu. Enkuantu lider boot Indonézia nian sira lei la kona. Julgamentu ba lider timoroan balu, depois hetan tiha pena, husik hikas fali ho , moos dala ruma sai fali hanesan estratéjia ida naksumik an iha prinsípiu ida naran ne bis in idem. Kazu ida la bele julga ba dalarua.

 

Iha relasaun ho preokupasaun ema balu nian katak Nova Era (Orde Baru) sei mosu fali bainhira Prabowo sai prezidente, ha’u hanoin ne’e preokupasaun lójika no normál ho hanoin katak povu Indonézia sei iha trauma ba ninia pasadu resente ba governasaun husi sira-nia prezidente Ditadór Soeharto. Maibé ha’u hanoin katak sistema demokrasia Indonézia nian oin seluk ona. Ita haree de’it ba esperiénsia governasaun Abdurrahman Wahid (Gud Dur) nian ne’ebé nu’udar líder husi movimentu musulmanu boot liu iha Indonézia, Nahdatul Ulama, ne’ebé maka parlamentu Indonézia nian bele hatún. Ne’e katak se parlamentu bele konsege hatún ona Gusdur, ita bele fiar katak lider prinsipál husi partidu polítiku sira, husi movimentu, sindikatu no asosiasaun sira no inklui moos povu Indonézia rasik iha ona persesaun di’ak ba sistema demokrasia no prinsípiu “rule of law”.

 

Ho nune’e maka ita bele iha esperansa katak biar se Prabowo maka sai karik prezidente, nia sei la la’o tuir ain-fatin ninia banin nian. Nia sei la sai ditadór tanba, ha’u fiar, nia moos iha konxiénsia ho razaun hirak ne’ebé ha’u temi iha leten, no moos partidu sira-ne’ebé maka apoia nia nu’udar moos partidu sira-ne’ebé maka konsidera nu’udar demokrátiku no lider sira-ne’ebé maka apoiu nia moos iha kompromisu di’ak ba demokrasia, governasaun di’ak (boa governação) no rule of law. Ita bele temi hanesan ezemplu Aman Reformasi ba Indonézia Amien Rais no antigu Prezidente Tribunál Konstitusionál Mahfud MD. Se mosu fali ditadór ida, Indonézia sei selun karun. Kazu bele sai hanesan fali akontesimentu iha 1999 no ha’u fiar lider prinsipál Indonézia nian sira-ne’ebé maka apoiu Prabowo no inklui Prabowo rasik iha konxiénsia di’ak ba kestaun ne’e. Ho nune’e maka Prabowo sei la sai ditadór.

 

Iha relasaun ho preokupasaun atu mosu hikas komunizmu iha Indonézia tanba iha afiliasaun husi jerasaun emar sira-ne’ebé uluk halo parte ba Partidu Komunista Indonézia nian iha PDIP nia laran, ha’u hanoin katak ne’e hanesan preokupasaun normál no lójika moos  bainhira ita haree hikas ba Indonézia nia pasadu kona-ba komunizmu iha Indonézia. Ha’u hanoin kualkér lider partidu polítiku sei la arriska atu lori harahun sira-nia nasaun no sira-nia polítika internasionál ho hanoin katak Indonézia maka maiór aliadu EUA nian iha Ázia. Presu lori uza hikas fali komunizmu iha sistema polítika Indonézia nian sei sai karun tebes. No ha’u fiar katak lider partidu polítiku sira sei iha konxiénsia ba ida-ne’e.

 

Tanba ne’e maka ha’u hanoin katak se Jokowi sai duni prezidente, nia sei la adota komunizmu nu’udar ideolojia ida. Liu-liu, komunizmu rasik la’ós trend ona iha ninia hun iha mundu osidentál no mundu ne’e rasik husik ona ideolojia komunista ba sorin husi sena polítika internasionál. Katak iha polítika internasionál, mundu ladún iha ona preokupasaun ba ideolojia komunista. Iha nasaun uitoan liu ona maka sei kaer ideolojia komunista mas ideolojia ne’e rasik mundu (mundu ne'ebé lidera husi USA) haree la’ós ona hanesan perigu ida. Situasaun sei sai diferente loos se ita sei iha tinan 1975 nian ba kotuk.

 

Agora karik Jokowi manan nia bele implementa de'it ideolojia ne'e ho ninia hanoin ou polítika (policy) ruma ba traballadór sira-nia moris di'ak tanba ne'e moos sai hanesan programa husi Prabowo nian. Ita hotu hatene katak koligasaun Merah-Putih forte tebes iha parlamentu tanba ne'e maka Jokowi sei book an la di'ak iha parte sensitivu balu hanesan atu la uza naran relijiaun iha KTP no ninia koligasaun sei la bele hasai lei ne'ebé maka bandu komunizmu iha Indonézia. Sé Jokowi koko obriga ninia polítika balu ne’ebé maka sensititivu iha komunidade Indonézia nia leet, iha possibilidade boot ninia destinu sei la dook hanesan Gusdur nian.

 

Atu remata, pasadu ne’e di’ak ou la di’ak, sé maka iha razaun ou sé maka la iha razaun, ita ema la iha ida maka bele fila ba kotuk lori hadi’a fali saída maka akontese tiha ona hanesan funu, oho malu,etc . Maibé ita ema sei bele determina dalan ba futuru. Saída maka akontese iha pasadu devia sai nu’udar lisaun di’ak ida lori hakat ba oin. Iha nasaun barak maka iha ninia pasadu ne’ebé maka metan. Mas buat sira-ne’ebé akontese iha pasadu sira ne’e iha ninia sirkunstánsia rasik. Nu’udar ema ita aprende husi pasadu lori kontribui buat ruma di’ak iha protesaun Direitus Umanus, liberdade, demokrasia, governasaun di’ak, rule of law, lori hamosu ambiente paz nian ida no ba nasaun nia di’ak no lori kontribui moos ba mundu nia di’ak.

 

Iha hanoin ne’ebé maka ideál, di’ak duni atu ema sé sé de’it maka halo krime (kualkér krime ida) hetan pena no biar nune’e kontinua respeitu nafatin ninia Direitus Umanus, ninia dignidade no respeitu moos supremasia lei nian. Tanba tebes duni pena ne’e hanesan dalan ida, husi dalan sira seluk, lori fó garantia ba autoridade lei nian no lori estabelese hikas estabilidade iha komunidade nia laran. Maibé ita moos hatene katak iha realidade lei formál (lei estadu nian) nein sempre bele konsege rezolve problema sira hotu iha komunidade nia leet. Eziste moos mekanizmu rezolusaun konflitu hanesan iha Timor-Leste porezemplu “Nahe Biti Boot” ou rezolusaun konflitu liuhusi lei tradisionál tuir idak-idak ninia kultura no lisan (Iha Timor-Leste no moos iha Indonézia) no maneiru oioin lori oinsá maka bele rezolve problema ida. Importante maka rezolve problema ida atu prevene la bele mosu hikas fali iha futuru oin mai, lori estabilidade no paz ba komunidade.

 

Problema mosu, iha violasaun Direitus Umanus, bainhira hahalok krime nian iha moos karakter polítiku ou nu’udar rezultadu husi konsekuénsia konjuntura polítika internasionál ida-ne’ebé hetan moos apoiu husi EUA. Tanba ne’e, ba kestaun sira hanesan ne’e ita presiza ulun malirin, maturidade no kuidadu lori tetu di’adi’ak lori rezolve sasán sira liuhusi dalan ne’ebé maka di’ak liu ba ita hotu.

 

Nota: Artigu ne’e uluk ha’u publika iha Tempo Semanal loron balu de’it bainhira Indonézia sira remata halo votasaun. Iha tempu ne’ebá sei halo hela kontajen ba votus.


mais sobre mim
pesquisar neste blog
 
July 2016
Sun
Mon
Tue
Wed
Thu
Fri
Sat

1
2

3
4
5
6
7
8
9

11
12
13
14
15
16

17
18
19
20
21
22
23

24
25
26
27
28
29
30

31


comentários recentes
Olá, fico muito feliz por fazer parte daqueles que...
Dr. Hercus,karik bele buka ha'u iha facebook Barba...
Sim Dra. Barbara Oliveira. Ha'u iha interese no in...
Boa noite Maun Hercus,Espera hotu di'ak. Artigu ka...
Muito bem, excelente artigo, muito bem escrito, ta...
Posts mais comentados
subscrever feeds
blogs SAPO