comentar
publicado por Hercus Santos at 07:50 pm

 

Ohin ha’u sai la’o halimar iha sidade Braga nia laran. Hanesan ita hotu hatene ohin loron 21 de Fevereiro ita komemora loron ba karnaval. Ema iha sidade laran barak tebes. Ema hatais kór oioin sira haksoit, dansa, hamnasa, han, hemu, nsst. Ho lian badak sira anima tebes loron karnaval ne’e. Maluk ida konvida ha’u lori ba haree karnaval tanba nia dehan feto mesak bonita de’it.

 

Tebes duni ema hotu selebra loron ohin ho haksolok tebes. Dezde labarik ki’ik, klosan, katuas, ferik sira hotu hatais ho idak-idak ninia gostu. Ha’u hamriik uitoan lori haree ema barak ne’ebé maka la’o bá mai. Iha ha’u-nia laran ha’u iha hanoin ida. Ema sira-ne’e haksolok tebes maibé karik sira-ne’e hatene arti husi karnaval ne’e?

 

Ha’u haree ho atensaun tomak. Ha’u haree katak lae. Karik iha ida rua ne’ebé maka sikat leet husi ema lubun barak ne’e hatene maibé ha’u sinte katak barak liu maka la hatene.

 

Karnaval ninia orijen mai husi Grécia (Yunani). Ema gregu sira tempu uluk halo to’os no kuandu sira-nia to’os fó rezultadu sira halo festa ne’e lori agradese ba sira-nia lulik sira. Hanesan loloos buat ne’ebé maka akontese iha ita-nia rain Timor-Leste. Ita kuda batar ou kuda haree depois kuandu ita ta batar ou ko’a haree ita halo mós ritual lori agradese ba rai no lulik sira tanba to’os sira-ne’ebé ita halo fó rezultadu di’ak. Iha Timor rasik ha’u komu mai husi Laklubar ha’u asiste serimónia ne’e bainhira ta batar halo lori agradese ba rai no lulik sira no dalaruma han batar hotu tiha ninia kain-mutin uza lori tuda malu. Katuas-ferik sira dehan katak iha tempu uluk serimónia tuda malu ne’e rame loos. Agora iha mudansa uitoan. Maibé serimónia lori agradese ba rai no lulik sira kontinua iha nafatin.

 

Igreja katólika rasik transforma tradisaun ne’e husi lisan gregu sira nian sai nu’udar tempu sarani sira haksolok, halo festa hanesan atu lori tama ba quarta-feira de cinzas. Quarta-feira de cinzas nu’udar loron dahuluk ba tempu kuarezma nian. Katak molok tama tempu hadera an nian sarani sira aproveita kedas loron ne’e lori halo festa, dansa hemu no han (iha ne’e liu-liu han na’an). Tanba iha tempu uluk tama ona ba tempu hadera an la bele ona hamnasa, la bele halo festa, la bele han na’an (liu-liu iha kuarta-feira no sesta-feira). La bele han na’an ne’e maka iha latin ema hanaran “carne vale”. Iha portugés tradúz sai hanesan “adeus carne”. Katak ita la bele tan ona han na’an iha tempu kuarezma nian. Carne vale ne’e maka depois hamosu naran karnaval. Iha tempu uluk tempu kuarezma hala’o ho rigór tebes. Biar iha tempu Indonézia nian mós tempu kuarezma ne’e ha’u sei lembra iha família laran nein múzika mós la bele toka hotu. Hala’o ho rigor tebes.

 

Importante nu’udar sarani ita hatene katak lakleur tan ita liutiha loron tolu husi karnavál ita tama ona ba quarta-feira de cinzas tempu dahuluk lori hadera an iha tempu quaresma nia laran ba to’o iha páskoa. Iha páskoa rasik ita la bele haluhan katak loron importante liu maka domingo de ressurreição. Hanesan São Paulo hateten se Kristu la moris hias ita-nia fiar la vale buat ida. Iha lian indonézia hateten katak “Jikalau Yesus Kristus tidak bangkit percumalah pemberitaan kami. Jikalau Yesus Kristus tidak bangkit, sia-sialah kepercayaan kalian. Ne'e ha’u halo tradusaun husi Bíblia Portugés nian – Difusora Bíblica husi koríntius 15:14 ne’ebé hateten katak “Mas se Cristo não ressuscitou, é vã a nossa pregação, e vã também a vossa fé”. Ita bele halo buat hotu, ita bele hadera an, ita bele haklaken evanjellu no ita bele mate tanba haklaken venjellu ne’e no se Kristu la moris hias buat ne’ebé ita halo ne’e la vale hotu. Se Kristu maka la moris hias hanesan iha parágrafu tuir fali Saun Paulo hateten “ aqueles que morreram em Cristo, perderam-se. Katak ema hirak ne’ebé mate ba Kristu sira-nia mate folin laek. Ita fiar metin iha Kristu tanba Kristu maka Maromak. Oinsá maka ita hatene Nia maka Maromak. Ninia moris hias! Ressureisaun!

 

Karnaval tempu ikus haan na'an nian lori tama ba tempu kuarezma lori ba to'o iha paskoa lori tama to'o iha loron domingu ressureisaun. Loron manan nian.  Ita-nia tempu hadera an nian ita halo tanba ita iha esperansa boot lori ba to'o iha domingu ressureisaun. Husi ksolok karnaval nian tama ba hadera an tempu kuarezma nian no lori soi nabilan loloos maka Kristu Maromak iha domingu ressureisaun. 

 

Hekerek iha Braga loron 21 de Março de 2012,

Hercus Santos


comentar
publicado por Hercus Santos at 12:13 pm

 

Ohin ha’u hakafodak bainhira ha’u lee facebook ba mana Cris Carrascalão nian. Ha’u hakfodak tanba iha ne’ebá hakerek konabá Ir. João Carrascalão ne’ebé maka fila ona ba aman Maromak ninia kadunan. Ha’u konfirma lori haree Dona Maria Ângela no Embaivadora Timor nian ba Portugal sira-nia facebook pois loos duni iha-ne’ebá mós hakerek konaba akontesimentu triste ne’e.

 

Haree fila hikas ba kotuk Istória Timor nian sei la ses husi partisipasaun família Carrascalão nian. Dezde tempu portugés kedas sira-nia partisipasaun ativa kedas ona. Iha 1975 João Carrascalão ho maluk lubuk ida harii partidu UDT nu’udar partidu dahuluk ne’ebé maka moris iha Timor.

 

Iha momentu depois husi UDT mosu partidu sira seluk. Partidu sira ne’e mosu ho idak-idak ninia mehi ba Timor nia destinu no futuru. Idak-idak ho ninia planu no estratéjia. Tanba hanoin ne’ebé maka la kona malu hamosu funu maun-alin ho intervensaun mós rai liur nian. Indonézia aproveita, ho apoiu husi rai seluk mós, invade rai-Timór. Ho nune’e hamosu integrasaun Timor ba Indonézia.

Líder UDT maioria hanoin katak integrasaun ba Indonézia la’ós sira-nia mehi. Entaun sira deside halai husi Indonézia ninia kontrolu. Ho nune’e maka líder UDT nian balu husu auzíliu polítiku ba Austrália no Portugal. Hahú husi CNRM to’o CNRT(liu iha CNRT nia laran) sira serbisu maka’as hamutuk ho Fretilin Timor ninia ukun an.

 

Ir. João Carrascalão ha’u ladun koñese nia di’ak. Hanesan líder sira seluk ha’u só koñese husi matenek-na’in sira-nia livru ne’ebé maka hakerek konabá Timor. Maibé ha’u sempre rona ha’u-nia família sira hahii tebes família Carrascalão sira-nia laran di’ak. Ha’u koñese Ir. João Carrascalão kuandu ha’u hetan konvite husi UDT lori sai membru honoráriu ba ninia kandidatura. Ha’u simu konvite ne’e tanba buat ida ha’u apresia husi ninia hanoin polítika maka justisa sosiál. Timor ukun an tenki iha justisa sosiál ba ema sira hotu ne’ebé maka terus ba lori hafoli Timor ninia ukun rasik an ne’e. Ha’u apresia tebes hanoin ne’e. Hahú husi ne’ebá ha’u mós hahú mehi konabá justisa sosiál ba Timor. Mehi ne’e sei moris to’o agora.

 

Iha lansamentu kandidatura Ir. João Carrascalão nian ba Prezidente Repúblika iha Hotel Timor ha’u simu responsabilidade lori lee ninia perfil (riwayat hidup) ho lian portugés no Nené Oliveira lee iha tetun.

 

Buat ida seluk ne’ebé ha’u apresia husi nia maka ninia kapasidade lori estabele relasaun amizade metin nafatin biar iha diferensa hanoin polítika. Iha tuur konversa halimar iha ninia sede kandidatura prezidente nian iha papelaria pereirita nia sempre dehan katak iha moris ne’e amigos ne importante biar iha hanoin diferente iha parte balu mas amigos são amigos. No nia hatudu ida-ne’e duni bainhira nia mantein relasaun amizade metin nafatin ho Marie Alkatiri biar iha ema balu ne’ebé la gosta nia lori tuda tan ninia karreta. Ha’u rona de’it konversa ne’e maibé indiretamente konversa ne’e hanorin buat di’ak ida mai ha’u. Maturidade lori tau sasan iha ninia fatin.

 

Ha’u ladun iha relasaun barak ho Ir. João Carrascalão maibé husi kontaktu badak ho nia, nia hafanun mehi ida mai ha’u atu mehi hamutuk ho nia: Justisa Sosiál ba povu rai Timor ne’ebé maka terus.

 

Adeus Ir. João Carrascalão! Tempu halai lalais loos no dalaruma tempu ne’e hanesan tiha fali semo maibé Ita-Boot ninia naran sei metin iha Istória Timor nian. Ami reza atu Maromak haraik fatin di’ak iha ninia kadunan santa no fó-kbiit ba família no amigus sira hotu iha tempu triste ida-ne’e nia laran.

 

 

Hakerek husi Hercus Santos iha Braga, 17 de Fevereiro de 2012


mais sobre mim
pesquisar neste blog
 
February 2012
Sun
Mon
Tue
Wed
Thu
Fri
Sat

1
2
3
4

5
6
7
8
9
10
11

12
13
14
15
16
17

19
20
22
23
24
25

26
27
28
29


comentários recentes
Olá, fico muito feliz por fazer parte daqueles que...
Dr. Hercus,karik bele buka ha'u iha facebook Barba...
Sim Dra. Barbara Oliveira. Ha'u iha interese no in...
Boa noite Maun Hercus,Espera hotu di'ak. Artigu ka...
Muito bem, excelente artigo, muito bem escrito, ta...
Posts mais comentados
subscrever feeds
blogs SAPO