comentar
publicado por Hercus Santos at 06:29 pm

 

 

Iha fiar katólika, ita sarani fó-importánsia no rekoñesiementu ba Virgem Maria nia papél importante nu’udar Inan Kristu Maromak nian. Virgem Maria sempre soi fatin espesiál iha ita sarani nia fiar no iha ita sarani nia moris. Ita fiar katak Virgem  hatutan Maromak ho Ita, ita ho Maromak. Husi Nia, Maksoin mai hamutuk ho ita. Maromak hola ilas nu’udar ema, moris nu’udar ema lori soi ita husi sala laran. Husi Nia ita hasoru Maromak, ita hetan Maromak.  Nia sai nu’udar intersesora ba ita-nia harohan ba Maromak. Hanesan iha rai Kanaan. Nia sai nu’udar intersesora husi família kaben-na’in atu Kristu transforma bee ba tua. Ho nune’e Nia sai intersesora mai ita ho Maromak.

 

Fiar hanesan ne’e maka ita sarani sempre tau papél importante iha Virgem Maria iha ita-nia moris. Ita halo prosesaun ba Esatatua Virgem Maria nian, ita vizita Santuário Virgem Maria nian, ita hola nia Estatua, nia medalla ou ita hola sasan ruma ne’ebé iha relasaun ho nia hanesan tersu no seluk-seluk tan no deserteza absoluta ita reza ba Nia atu Nia hatutan daet ita-nia harohan ba Maromak. Ho liafuan badak katak Virgem Maria soi fatin importante no espesiál ba ita sarani nia moris.

 

Ita-nia jestu sira-ne’e hotu halo sarani-protestante no jeová sira la komprende. Sira hakfodak ho ita-nia devosaun ba Virgem Maria. Ba sira, Maria la soi papél importante nein uitoan iha sira-nia atividade relijioza nian. Sira esklui tiha importánsia Maria nian iha sira-nia moris. Maibé sira haluhan tiha ou karik sira hatene mas sira finje no lakoi atu rekoñese katak husi Maria maka moris mai iha mundu Kristu Maromak. Kristu Maromak la’ós ser májiku ida-ne’ebé hanesan ita haree iha filme derrepente de’it mosu. Lae! Maromak mai moris ho ita (Emanuel) halo ilas hanesan ita liuhusi Virgem Maria. Virgem Maria maka kous Kristu, fó-han, fó-hatais, eduka Kristu Jesus. Kristu tuir prosesu moris ita ema nian hanesan loloos ita. Han hanesan ita, toba hanesan ita, serbisu hanesan ita, lao hanesan ita. Buat hotu-hotu hanesan loloos ita ema maibe só sala de’it maka la iha.

 

Virgem Maria simu papél importante nu’udar inan akompaña Moris Kristu nian. Tanba ne’e se Kristu moris husi Virgem Maria no se Kristu ita bolu Maromak entaun ita iha duni razaun lori hanaran Virgem nu’udar Inan Maromak. Oinsá maka kristaun protestante no jeova sira hahii Kristu Jesus lori haluhan tiha inan ida-ne’ebé maka fó buat hotu-hotu lori tau-matan ba oan Kristu Jesus? Ha’u dalaruma hanoin fali se sira idak-idak (protestante no jeová sira) depois sai boot no hetan tiha susesu sira bele haketak sira-nia an husi sira-nia inan ho aman? Sira bele nega tiha fali ema sira-ne’ebé maka hakiak sira? Sira bele tau tiha ba sorin ema sira-ne’ebé maka fó buat hotu-hotu ba sira-nia moris? Ida-ne’e maka ha’u haree sarani-protestante no jeova sira-nia fallansu boot.

 

Maibé tebes duni buat ida fiar ita la bele kestiona. Idak-idak ho ninia fiar. Ita nunka bele halo hotu debate bainhira iha relasaun ho fiar. Importante maka ita respeita malu lori moris iha toleránsia no dame nia laran. Nu’udar sarani ita moris mai ita ligadu ona ho papél fundamentál no importante Virgem Maria nian iha Kristu Maromak nia moris. Tanba ne’e maka ita sempre fó fatin espesiál ba Virgem Maria iha ita-nia moris tomak. Hanoin hanesan ne’e maka lori ita sarani sira buka atu reza tersu, tuir prosesaun ba estatua Virgem Maria nian no vizita lori reza iha Santuáriu Virgem Maria nian. Ita timoroan sempre mehi lori vizita Fátima. Kuandu ita mai estuda ou mai tuir treinamentu ruma iha Portugal ita sempre buka tempu ruma lori vizita Virgem de Fátima. Ha’u-nia esperiénsia rasik, ha’u sempre vizita Virgem de Fátima tanba alémde Nia nu’udar Maromak nia inan no intersesora ba Maromak iha tempu hanesan Nia nu’udar ha’u-nia Inan Sarani. Husi ne’e ha’u sempre iha mehi lori vizita mós rai santu seluk maka hanesan Lourdes.

 

Lourdes nu’udar fatin ida-ne’ebé maka Virgem Maria mosu ba Bernadete, feto-raan ida husi família kiak maibé soi edukasaun fiar katólika nian diak tebes. Ha’u haree tiha filmajen konabá aparisaun Na’in-Feto nian iha Lourdes ha’u mós iha hakarak boot lori vizita Lourdes. Buat rua ne’ebé impressionante tebes mai ha’u maka Napoleão Bonaparte hakruuk lori hasai ninia orden lori bandu sarani sira ba Lourdes hafoin ninia oan hetan isin diak tanba bee husi fatin ne’ebé Virgem mosu ba. Oinsá maka ema hanesan Napoleão Bonaparte ne’ebé maka duru bele simu ninia “lakon”. Buat ida seluk maka Santa Bernadete ninia isin tomak to’o ohin loron. Buat rua ne’e bele iha esplikasaun oioin husi matenek-na’in sira ha’u sei respeita maibé ha’u sei nafatin lori dehan katak só ho Maromak nia intervensaun de’it maka buat rua ne’e bele akontese.

 

Hahú husi haree filmajen ne’e hamosu ha’u-nia planu lori vizita fatin santu Lourdes. Dalaruma ita lubun halo planu atu vizita fatin ruma la realiza tanba fatór oioin. Dalaruma tempu livre maka la hanesan. Dalaruma situasaun finanseiru la favorese iha tempu hanesan no dalaruma sei iha razaun oioin tan.  Kuandu ha’u-nia bolsa tama ha’u tau prioridade ida maka vizita Lourdes. Ha’u ho primu Rolando ba husu tiket bis nia folin ba-mai euro 130. Ha’u la hanoin rua-rua tan. Ha’u sei pesan. Agora problema ida maka fatin. Oinsá maka ha’u bele ba toba iha ne’ebá? Hanoin ba-mai ha’u to’o iha konkluzaun ida. Ha’u ba vizita fatin santu Lourdes tanba fiar. Entaun iha momento hanesan ne’e ha’u presiza mós tau fiar ba Virgem de Lourdes. Ba mesak, la hatene fatin atu toba, la koñese dalan, la koñese Lourdes. Nekat ba de’it. Iha ha’u-nia hanoin se ha’u la hetan fatin toba ha’u sei buka ema nia uma nia varanda ou loja ruma nia varanda, banku ruma iha jardin sira ou kualkér fatin ruma ne’ebé maka ha’u bele hanahe an lori deskansa netik.

 

Viajen ho bis todan tebes. Sai husi Sentrál Kamionajen Braga kinta 05-04-2012 dadersan tuku 08:45. Liuhusi fatin lubuk ida iha rai-Espanha. Kalan passa de’it iha bis laran. Kondisaun bis nian la permite atu toba. To’o iha fatin ida naran Tarbes – Fransa tuku 3 dadersan. Tenki hein iha madrugada ne’ebé maka malirin tebes oras lubuk ida to’o Estasaun Komboiu nian atu loke. Apaña komboiu husi Tarbes ba Lourdes. To’o iha estasaun komboiu Lourdes nian hein tan oras ida hanesan ne’e para apaña bis lori ba Santuário de Lourdes. To’o iha Santuário de Lourdes ha’u tahan an la bele ona tanba hakarak loos ona atu ba haree fatin mosu Na’in Feto nian ne’e oinsá loos. Molok atu ba to’o iha Gruta Na’in-Feto mosu fatin ha’u passa liuhusi Santuário nia oin no iha-ne’ebá iha ema lubun barak prepara an hela lori halo Via-Sacra hamutuk ho ema moras sira. Ha’u hapara ha’u-nia ain lori tahan ha’u-nia vontade no kuriozidade boot lori ba haree Gruta atu ha’u hamriik lori tuir lai Via-Sacra iha Sexta-feira Santa. Molok Via Sacra hahú ha’u tama uluk lai ba reza iha Santuáriu laran. Reza no haree tiha Santuáriu laran ha’u haree mákina ida lori hatama osan euro 2 lori hasai medalla Na’in Feto nian ida. Ha’u hatama osan ba medalla la sai. Ha’u haree osan lubuk ema hatama nahisik hela iha mákina laran. Taka metin tiha fali fatin kuak atu osan monu sai. Ha’u buka “petugas” Santuáriu nian ha’u ba hakbesik nia lori fó-hatene nia konabá kestaun ne’e. Ha’u hanoin di’akliu fó-hatene nia para nia bele buka rezolve tiha problema ne’e atu ema seluk hakarak hetan karik medalla ne’e mós sei la hetan tan problema. Ha’u fó-hatene tiha nia depois nia ba haree tiha nia la’o tama ba sala ida laran nia fila ho tudik badak ida lori sukit sai osan sira ne’ebé taka kuak fatin lori hamonu osan ba. Nia la konsege hasai tanba tudik ne’e badak liu. Nia ba buka fali besik ki’ikoan ida lori sukit sai hotu tiha osan sira-ne’e. Nia konsege duni. Ha’u hatama osan euro 2 ba medalla Na’in-Feto nian sai. Ha’u foti tiha medalla ne’e sai mai liur lori tuir Via-Sacra.

 

Tuir tiha Via-Sacra ha’u hasai masa bee nian ne’ebé ha’u lori husi Braga ba kuru bee santa Lourdes nian. Ha’u haree bee ne’e mai husi kedas Gruta Na’in Feto mosu ba ne’e. Ha’u reza tiha maka ha’u kuru. Ha’u kuru tiha ha’u lori lilin ida lori ba reza iha Gruta. Iha Gruta ha’u forma tuir ema lubun sira-ne’ebé hakarak tama ba kaer didin lolon Gruta nian. Ha’u mós tama tuir. Iha sentimentu hakmatek tebes iha ha’u-nia laran. Ha’u tama lao besik loos fatin ne’ebé ha’u haree iha filme tia ida lori nia oan ne’ebé mate tiha ona lori ba hatama iha bee ne’e no depois nia oan moris hikas fali. Iha ha’u-nia laran ha’u hanoin kedas fatin ne’e maka ne’e. Oh Na’i, fatin ne’e maka ne’e. Bee ne’e maka ne’e. Ema hotu-hotu lori liman kaer bee iha didin lolon lori kose ba oin. Ha’u mos halo hanesan. Ami hotu halo hanesan. Kose bee ba an lori hasae mós harohan. To’o iha estátua Na’in-Feto nia okos ha’u hateke sae lori reza. Reza tiha ha’u foti liman lori halo sinál rei nian ba estátua Virgem nian ne’ebé maka dook uitoan husi ha’u-nia ulun. Depois ha’u sai ba reza iha fatin reza nian iha parte liur.

 

Iha fatin reza nian, ha’u reza ho ema lubun ida. Ema sira-ne’e oioin de’it. Husi ema labarik, joven, katuas no ferik inklui ema difisiente sira mós.  Reza hotu tiha ha’u hateke tun sae ha’u nota buat ida. Iha fatin ne’e ema husi India barak tebes. Tuir fali maka ema husi Filipina. Depois ema husi fatin seluk-seluk tan. Ema husi rasa oioin no nasaun oioin. Iha moment sira hanesan ne’e ha’u aproveita hasai foto. Foto importante tebes nu’udar rekordasaun ida ne’ebé maka sei moris ba nafatin. Ha’u mós tesik ba sorin lori ba sunu lilin.

 

Ha’u fila ba tuur de’it iha oras lubuk ida nia laran lori haree estátua Na’in Feto nian. Ha’u haree ema barak tebes. Depois ha’u reza tan. Reza tiha ha’u hanoin ha’u ha’u ba hola objectos religiosos sira. Depois ha’u mai reza tan iha Gruta ne’e. Reza hotu tiha ha’u hanoin ha’u fila ona. Ha’u hanoin sala tiha konabá ha’u-nia viajen fila nian ba Braga. Entaun ha’u fila lalais lori ba apaña bis lori ba to’o iha sentrál komboiu nian. To’o iha sentrál komboiu hola tiha billete no ha’u fila ba tuur lori hein oras 2 tan maka ha’u-nia komboiu to’o. Ha’u loke haree billete husi Tarbes fila ba Braga ha’u haree fali katak só domingo tuku 2 dadersan maka ha’u apaña bis husi Tarbes fila ba Braga. Ne’e katak ha’u tenki fila ba toba iha Lurdes. Ha’u ba kansela fali viajen lori marka ba aban nian. Funsinária ida-ne’ebé atende ha’u hateten katak ha’u tenki hetan penalti katak ha’u tenki fó tan euro ida sentavos 50 lori adia ha’u-nia viajen ba aban fali. Nia temi penalti ha’u hakfodak no preoukadu loos. Ha’u hanoin keta selu osan boot karik. Afinál lae. Ha’u dada is hakmatek. Ha’u fila ba apaña fali bis lori fila ba Santuário Lourdes.

 

To’o iha parajen bis nian iha Santuário de Lourdes, buat ida ha’u hanoin kedas maka fatin atu toba. Ha’u hulan ba mai pasta boot hamutuk ho bee. Sasan sira ne’e ita lori ba-mai hela de’it to’o ita sinte katak sasan sira-ne’e todan. Ha’u husu informasaun iha ponto de informação. Ema sira dehan katak iha ponte ne’e ba sorin maka alojamentu baratu liu. Tanba udan, ha’u ba hamriik iha uma ki’ikoan ida-ne’ebé ema lori faan “makanan ringan” ruma. Fatin ne’e loloos hanesan sombriña boot ida. Maibé udan sei turuk-turuk. Ha’u buak hamrik iha fatin ne’ebé maka udan turuk-turuk la kona. Sein konsiénsia, ha’u haree ba ha’u nia kalsa ran lubuk ida. Ha’u haree ba ha’u-nia liman afinál ha’u-nia liman fuan ki’ikoan ran nahisik tiha ona. La hatene ha’u-nia liman fuan ki’ik kanek derrepente de’it. Ha’u sinte moras uitoan. Ha’u preokupa uitoan tanba keta bele hamosu isin-manas karik entaun problema boot fali ona. Ha’u-nia kondisaun saúde mós dalaruma problema hela de’it. Ha’u haree udan para ona uitoan. Ha’u tenki ba buka ona fatin ruma para lori tau hela tiha pasta boot ne’e ho sasan sira iha plástiku laran ne’e. Plástiku ran barak loos. Ha’u to’o iha ponte sorin, ha’u ba husu alojamente iha Hotel ida naran Marquete. Funsionária ne’e dehan katak kalan ida euro 35 ha’u hanoin ne’e karun uitoan. Maibé ha’u hanoin tiha iha minutu ida-rua nia laran ha’u foti desijaun lori simu. Ha’u subar tiha plástiku ne’e maka iha ran barak ne’e atu nia la bele haree. Ha’u tenta subar mós ha’u-nia liman ne’e maka kanek no ran ne’e. Ha’u tauk ketak nia haree depois keta nia lakoi simu ha’u toba iha ne’e karik. Nia fo xafe mai ha’u no ha’u simu tiha xafe lori ba liu kuartu. Ha’u ba buka ha’u-nia kuartu. Ha’u rona ema balun ko’alia lian Indonézia. Ha’u hanoin ne’e ema Indonézia karik. Maibé ha’u rona de’it lian, la haree oin. Ha’u sa’e lori hetan ha’u-nia kuartu. Ha’u tama ho tama hatun tiha ha’-nia pasta boot tau tiha ba didin hun ho di’ak hamutuk ho plástiku ne’e. Ha’u troka tiha sasan ba plástiku foun no plástiku ho ran ne’e ha’u tau tiha lixu fatin. Ha’u sae ba kama leten nahe an liu kedas lori deskansa tiha uitoan. Kole tebes hanesan ne’e maka hetan kama diak ida ha’u langsung toba kedas. Liutiha minutu 30 ou 45 hanesan ne’e ha’u hanoin ha’u presiza lao halimar lori haree objecto religioso sira. Ha’u haree oras mós besik kalan ona. Entaun di’akliu mós ha’u aproveita lori ba jantar. Ha’u hola tiha sasan balu tan depois lori mai tau tiha tanba fatin besik hela depois ha’u sai ba buka loloos ona hahan lori janta.

 

Ha’u la’o tun-sae lori buka hahan saída maka kona loos ha’u-nia laran. Ha’u la’o tun-sae lori buka nafatin. Ha’u hanoin hahan paling diak mai ha’u maka etu, fehuk sona, man-tolun sona hamutuk ho bife. Iha portugés karik ema bolu bitoque. Ha’u haree la iha. Ha’u hanoin naran katak na’na ruma ho etu ou fehuk-sona. La’o tuun fali ba husu iha restaurante ida. Funsionária ida simpátika loos lao sai mai husu, depois ha’u dehan ba nia katak imi iha hahan saída de’it. Nia fó menu mai ha’u maibé ha’u la komprende tanba hakerek de’it ho lian franses. Ha’u husu ba nia imi la iha hahan ruma ne’ebé iha etu. Nia dehan katak lae. Entaun iha fehuk-sona ho na’an. Nia hatan katak iha. Derrepente kazál ida sira na’in rua ho tinan avansadu uitoan ona husu ba funsinária ne’e se iha hahan ruma ne’ebé maka la iha na’an. Ha’u hakfodak. Liahusuk kazál ida ne’e nian fó-hanoin hikas mai ha’u katak ha’u la bele han na’an iha sexta-feira santa. Na’i perdua ha’u no obrigadu Na’i tanba Ita-Boot fó-hanoin hikas mai ha’u. Ha’u la hanoin rua-rua tan ona lori buka hahan. Ha’u dehan ba funsionária ne’e katak ha’u mós hakarak han hahan ne’ebé maka la iha na’an.  Ha’u tama ba han. Han tiha ha’u fila ba ha’u-nia otel lori prepara an lori ba reza.

 

Pois iha ha’u-nia orasaun hotu-hotu iha Gruta Lurdes nian ne’e ha’u halo orasaun pesoál, orasaun ba família sira hotu no orasaun espesiál ba rai-Timor nia paz, unidade no dezenvolvimentu. Kuandu ha’u halo orasaun ba paz iha rai-Timor ha’u hanoin hetan uluk iha tempu okupasaun Indonézia nian iha ha’u-nia família uma laran ami sempre reza tersu kalan-kalan lori reza mós orasaun ida hanaran orasaun ba paz iha rai-Timor.  Orasaun ne’e ha’u la hafal tiha ona. Haluhan total. Entaun ha’u halo orasaun rasik ba paz iha rai-Timor. Maibé la’ós de’it paz maka ha’u harohan maibé mós unidade no dezenvolvimentu. Unidade iha-ne’e liu-liu ba ukun na’in sira. Husi unidade ukun na’in sira sei tun ba unidade populasaun sira nian.

 

Tuur iha kalan nakukun ho roman husi lilin sira iha mota Lourdes nia sorin, ha’u sinte furak tebes. Ha’u sinte hakmatek tebes. Fatin ne’e fatin santu duni. Iha sensasaun ida-ne’ebé kmo’ok tebes. Ha’u la hatene oinsá maka atu bele esplika sentimentu ne’e. Maibé kuandu ha’u fila to’o iha Braga ha’u konta ba maluk sira katak se ha’u bele sujere fatin ida atu ba vizita ba Ita-Boot sira ha’u sei sujere vizita Lourdes. Fatin ne’e furak tebes atu lori reza no lori halo meditasaun. Ita sinte tebes ninia hakmatek no rai ninia santu. Iha fatin ne’e maka Virgem hateten sai ba Bernadete ha’u maka Imaculada da Conceição.

Imaculada da Conceção katak Maria moos iha momento kous Cristo no depois. Maria sempre mos husi sala ita ema nian. Ne’e maka fiar ita sarani nian!

 

Ha’u tuur iha rai lori reza ho oras lubuk ida. Pois iha kalan ne’e entre reza, tuur lori haree ema sira ne’ebé maka reza mós no la’o ba mai no depois husu ema nia tulun lori hasai fotografia.

Reza iha fatin santu no rai hakmatek ho kalan ne’ebé ho roman husi lilin sira iha mota ninin rona bee nia lian, natureza ninia hakmatek, hateke sai ba lalehan no hateke lori kontempla ambiente ne’ebé bele ajuda haklean ita-nia orasaun halo ita sinte duni katak ita horis iha fatin ne’ebé maka santu.

 

Reza tiha ha’u la’o ba-mai lori kontempla konabá ha’u-nia moris. Pois ha’u presiza Maromak ninia mahan iha ha’u-nia moris. Nu’udar ema ha’u la perfeitu. Maibé iha ha’u-nia imperfeisaun ne’e ha’u hametin liután ha’u-nia fiar ba Maromak. Moris iha mundu ne’e sementara de’it. Importante maka saída maka ha’u bele kontribui ba sosiedade nia diak. Ha’u haree ha’u-nia estudu mós seidauk la’o diak hanesan buat ne’ebé maka ha’u hakarak. Maibé ha’u tau fiar metin nafatin ba Maromak. Ha’u fiar katak molok ha’u moris mai Maromak determina tiha ona ha’u-nia destinu no ha’u tenki tau fiar metin nafatin ba Maromak.

 

Reza hotu tiha ha’u fila ba toba ona iha otel. To’o iha otel ha’u haris tiha depois ha’u toba liu kedas. Ha’u toba no ha’u mehi ladun di’ak. Mehi rungu-ranga loos. Dadersaan ha’u hader haris tiha depois ha’u prepara para sai husi otel. Ha’u haree oras tuku 10 tiha ona. Ha’u tenki sai lalais ona para molok atu ba estasaun komboiu ha’u presiza ba reza tiha lai iha Gruta hanesan atu fó-hatene de’it ba Virgem de Lourdes katak ha’u fila ona ba Portugal no tau matan karik mai atan ha’u. Depois ha’u ba apaña bis lori ba estasaun komboiu nian. Iha estasaun komboiu ha’u apaña komboiu husi Lourdes ba Tarbes. To’o iha estasaun komboiu ha’u tenki tuur oras lubuk ida iha estasaun laran para hein tempu lori ba jantar. Ha’u ba jantar iha restaurante simples ida ema indiana nian. Tanba iha-ne’ebá iha hahan ida naran kebab. Hahan ne’ebé pas ba ita timoroan nia gostu. Han hotu tiha ha’u tenki tuur hein bis lori fila mai Braga. Hein bis oras lubuk ida nia laran. Malirin halo ha’u terus uitoan. Mas pasiénsia.Presiza halo sakrifísiu. Tuku 2 ho balu dadersan ha’u foin apaña bis lori fila mai Braga.

 

Husi Tarbes mai to’o iha fatin ida naran Suco iha rai-Espanha maka troka bis. Molok sae bis iha minutu 30 lori bele ba casa de banho ou ba hahan buat ruma iha restaurante. Depois ha’u fila foti pasta lori hein bis ba Braga nian. Ha’u tuur hakmatek hela. Ha’u tuur mesak. La iha buat ida lori halo. As vezes ha’u la’o ba-mai hanesan lori passa tempu de’it. Ha’u haree ha’u-nia telemóvel iha chamada não atendida lubuk ida loos. Família sira husi Timor maka telefone. Entaun ha’u tau atensaun ba telemóvel. Ha’u haree telemóvel nakdedar no lian. Ha’u simu no ha’u rona notísia triste tebes. Ha’u-nia padrinho Maromak bolu hikas ona. Notísia triste lahalimar xoke ha’u-nia fuan laran. Notísia triste ne’e hanesan rai tarutu iha loron manas nia laran. Ha’u nunka hanoin sedu loos Maromak bolu ha’u-nia padrinho ne’e. Triste no matan sulin iha ha’u-nia mesak nia laran. Triste tebes tanba ha’u-nia padrinho ema ida-ne’ebé laran diak tebes. Nia sempre ajuda ami. La’ós de’it ami família sira maibé ema hotu-hotu. Nia laran diak tebes. Laran osan-mean tebes. Kuandu ha’u tama Seminário nia kontente lahalimar. Nia dehan ba ha’u-nia pai no mãe katak ha’u presiza saída de’it iha Seminário fó-hatene de’it ba nia. Nia ajuda ha’u barak tebes. Tanba nia hakarak tebes atu ha’u sai amu-lulik ida. Maibé dalan amu-lulik nian la’ós mai ha’u. Nia triste no família hotu triste ha’u sai husi Seminário maibé sira hotu entrega buat hotu-hotu ba Maromak de’it. Ha’u-nia mata-been tuun bainhira hanoin nia laran di’ak sira hotu ne’ebé nia halo mai ami família sira hotu. Nia tulun ami barak tebes. Nia laran diak tebes. Laran osan-mean.

 

Iha susar laran ami laran metin tebes ba nia. Nia maka ami no reinu Funar ninia laran metin. Triste tebes rona notisia ne’e. Nia fila hikas ba Aman Maromak nia kadunan ha’u sinte lakon ema importante tebes iha ha’u-nia moris. Ema ida-ne’ebé ha’u, família sira hotu inklui reinu Funar sira tomak laran metin tanba nia hanesan aman diak ida mai ami hotu. Nia haree ami tomak. Ema balu kuandu ko’alia konabá liurai sira hateten katak liurai sira mesak halo an deit, mesak esplora povu sira de’it, iha ha’u-nia laran ha’u dehan hein lai. Keta hatun liurai sira hotu hanesan ne’e. Ha’u fiar katak iha balun la hanesan ne’e. Ezemplu ida no ha’u bele sai testemuña maka ha’u-nia tiun no padrinho Domingos do Espírito Santo ne’e. Nia ho ha’u-nia mãe nu’udar beioan husi Dom ikus liu husi reinu Funar nian maka Dom José do Espírito Santo. Reinu Funar uluk halo revolta dala tolu iha tempu portugés nian.

 

Iha tempu Dom José do Espírito Santo nian, governador Timor-Portugues foti nia sai liurai no Dom iha palácio Governador nian iha Lahane. Nia iha oan barak no beiaoan lubuk ida. Satán bisneto de’it sura maka la bele. Maibé ami hotu sempre unidos. Ran Espírito Santo nian ran ida-ne’ebé maka simples, hadomi malu tebes, haraik an no la gosta de’it maka buat bosok. Biar ami barak tebes maibé ami sempre hadomi malu no unidos tebes. Molok Dom José do Espírito Santo husik hela mundu nia fahe ninia haketak Fatumakerek nia entrega ba ninia feton mesak nia oan maka António de Oliveira maka ukun. Funar nia entrega ba ninia oan mane Anibal do Espírito Santo maka ukun. Iha lisan Dom José do Espírito Santo foti António de Oliveira nu'udar oan mane. Tanba ne'e mezmu liurai António de Oliveira ukun Fatumakerek maibé uma lisan ida de'it maka uma lisan liurai Lawado iha Funar. Iha lisan ran Espírito Santo ho ran Oliveira ida de'it. Biar ohin loron suku rua ketak-ketak ona maibé iha lisan nafatin ida de'it. 

 

Ha’u to’o iha convento do carmo fatin ne’ebé maka ha’u hela ha’u loke facebook haree nia foto lori tag mai ha’u-nia facebook ha’u la tahan lori tanis ho lian tiha de’it. Tanba ha’u tahan hela de’it mata-been iha bis laran. Ha’u dalaruma sinte moe uitoan tanis iha fatin públiku. Entaun iha kuartu laran no fatin dook husi públiku ha’u tenki tanis duni tanba tahan la bele ona ha’u-nia tristeza ne’e. Maluk sira mai hamaluk ha’u. Sira husu ha’u tanba sa maka ha’u tanis. Ha’u ko’alia hotu ladiak. Ha’u hatudu de’it foto iha facebook no haruka de’it sira lee iha ha’u-nia facebook. Sira komprende ha’u tanis tanba sá. Loraik ne’e kedas ha’u hamutuk ho maluk sira ami reza kedas tersu ida ba ha’u-nia padrinho ninia klamar atu Maromak haraik rahun kmanek ba nia iha Kadunan Santa Lalehan nian.

 

Buat rua ne’ebé maka ha’u sinte husi viajen ba Lourdes. Sentimentu ksolok tanba ba Lourdes fatin santu, fatin ne’ebé maka Virgem Imaculada da Conceição mosu no iha tempu hanesan iha sentimentu tristeza, sentimentu lakon ema ida-ne’ebé maka ha’u hadomi, ha’u tau hela laran ba, ha’u no família no reinu sira hotu ninia laran metin. Nia husik ami, ha’u sinte ami hanesan loos bibi sira-ne’ebé maka lakon bibi-atan diak. Descansa em paz ha’u-nia tiun, aman-sarani no ha’u-nia liurai laran osan mean.

 

 

 

 

 

 

 

 

 

 

 

 

 


mais sobre mim
pesquisar neste blog
 
April 2012
Sun
Mon
Tue
Wed
Thu
Fri
Sat

1
2
3
4
5
6
7

8
9
10
11
13
14

15
16
17
18
19
20

22
23
24
25
26
27
28

29
30


comentários recentes
Olá, fico muito feliz por fazer parte daqueles que...
Dr. Hercus,karik bele buka ha'u iha facebook Barba...
Sim Dra. Barbara Oliveira. Ha'u iha interese no in...
Boa noite Maun Hercus,Espera hotu di'ak. Artigu ka...
Muito bem, excelente artigo, muito bem escrito, ta...
Posts mais comentados
subscrever feeds
blogs SAPO