comentar
publicado por Hercus Santos at 03:16 pm

 

Maluk lee-na'in sira hotu. Ohin ha'u hakarak atu partilla ba Ita-Boot sira hotu ha'u-nia poezia ki'ik ida-ne'e ho títulu ita sei hamutuk nafatin iha memória sira hotu. Memória maka buat ida eterna liu ba ita ema nia moris. Memória mai husi esperiénsia ita ema nian ne'ebé maka ita pasa liu no ita ita sei nunka bele tan atu fila ba kotuk. Tanba moris ne'e sempre la'o ba oin. Husi ne'e ha'u hamosu poezia badak ida hanesan tuir mai ne'e. Ha'u dezeja ba Ita-Boot sira hotu boa leitura e bom domingo!

 

 

Ita sei hamutuk nafatin iha memória sira hotu

 

 

Sei to’o tempu atu ita sei hetan malu hikas

Iha tempu ne’ebé maka ita sei la hanoin hetan

Se moris ne’e hanesan anin

Iha ne’ebé de’it ita ba no ita iha

Ita sei hanoin malu nafatin

Ita sei iha saudades ba momentu sira-ne’ebé maka ita liu ona hamutuk

Biar karik momentu sira-ne’ebá kahur

Entre ksolok no susar

Hamnasa no tanis

Liafuan midar no hirus nian

Sei sai ksolok bainhira ita hanoin hikas

No karik dalaruma sei hamosu mata-been triste nian

Tanba ita sei la bele ona fila ba kotuk

Ita só bele hanoin de’it tempu sira ne’ebé liu ona

Hanesan memória eterna ida-ne’ebé sei hamaluk hela de’it ita

Iha ita-nia moris tomak

No karik ita sei hanoin tempu sira ne’ebá ho ksolok

Ou ita sei hanoin ho triste

Ou karik sentimentu rua ne’e sei kahur hamutuk sai ida de’it

Maibé buat ida sempre loos maka moris ne’e sempre la’o ba oin

Buat ida ne’ebé liu, liu ona

Tanba ne’e karik di’akliu ita tenki hamahan an nafatin

Iha Na’i ita-nia Maromak ninia mahan

Ita-nia ain sama ba rai no moris hamutuk ho rai

Ita-nia liman no laran di’akliu hasa’e ba lalehan

Tanba moris ne’e la’ós rai nian de’it

Maibé sei iha moris iha mundu seluk mós

No husu boot atu ita sei hamutuk nafatin iha-ne’ebá

Tanba karik moris ne’e hanesan anin

Iha ne’ebé de’it ita bá no ita iha

Ita sei hamutuk nafatin iha memória sira hotu.

 

Hercus P. Santos

Braga 4 de Janeiro de 2011


mais sobre mim
pesquisar neste blog
 
April 2012
Sun
Mon
Tue
Wed
Thu
Fri
Sat

1
2
3
4
5
6
7

8
9
10
11
13
14

15
16
17
18
19
20

22
23
24
25
26
27
28

29
30


comentários recentes
Olá, fico muito feliz por fazer parte daqueles que...
Dr. Hercus,karik bele buka ha'u iha facebook Barba...
Sim Dra. Barbara Oliveira. Ha'u iha interese no in...
Boa noite Maun Hercus,Espera hotu di'ak. Artigu ka...
Muito bem, excelente artigo, muito bem escrito, ta...
Posts mais comentados
subscrever feeds
blogs SAPO